Pigpaplano na kan Philippine Ports Authority (PPA) an paglangkaw nin storage fee sa mga nakatenggang kargamento sa Manila International Container Terminal (MICT).
Huli digde, pigtalaan na kan PPA an mga serye nin konsultasyon sa mga stakeholders tangani na mapag-desisyunan ini sa orog na marikas na panahon.
Segun ki PPA General Manager Jay Santiago, pig abuso na kan kadakol na negosyante an storage policy kan PPA asin pabayaan na sanang magtinir an saindang kadakol na container sa pier.
An paglangkaw nin storage fee piglalaoman na mapugol sa mga negosyante sa siring na modus, apwera pa sa dugang na koleksyon para sa gobierno.
Paliwanag pa ni Santiago, mas pigpipili soboot kan mga negosyante/importer na imantinir na sana muna an saindang mga container sa MICT kaysa sa darahon an mga ini sa warehouse makalihis an clearance kan Bureau of Customs.
Ini huli man sa maabot sana sa P600 kada aldaw an bayad sa MICT mantang sa mga warehouse pigkakarkulong an bayad puon P3,500 hasta P5,000 kada aldaw.
Sa presente soboot, igwa nin labing 700 container an nakatenga sana sa pier asin kadakle pigdeklarar komo mga agricultural commodities.
Posible soboot na pigtutuyo na man kan mga importer mantang pighahalat ninda an paglangkaw kan presyo kan mga nasambitan ng produkto antes pa iluwas sa merkado.
Segun ki Santiago, maikokonsiderar ini komo simpleng hoarding, bagay na kaipuhan na soboot na aksyunan, kabali pa an iba pang ahensiya kan gobyerno.
