NAGA CITY- Kamawotan kan Philippine Red Cross Camarines Sur na madugangan pa an saindang pondo para sa pag-uswag kan saindang organisasyon.
Sa entrevista kan Bombo Radyo Naga ki Maria Felisa Badiola, Chapter Administrator kan Philippine Red Cross Camarines Sur Chapter, sinaysay kaini na kada taon igwa soboot na mi-missed out sa saindang plano kun kaya kaipuhan na pahewason pa an budget tanganing madagos an trabaho kan saindang chapter.
Sigun pa ki Badiola, nabubuhay an saindang organisasyon sa pondo siringman an saindang mga sweldo an gikan digde kun kaya kaipuhan na magkaigwa nin strategic plan sa laog nin limang taon na maserbeng giya sa pagtatrabaho.
Huli digde, kaipuhan na pahusayon pa an mga serbisyo asin programa na pigtatangro sa publiko tanganing mamantinir na pusog an saindang organisasyon.
Sa paagi kaini mas makaka-reach out sa mga area sa bilog na probinsiya kan Camarines Sur.
Mientrastanto, apwera sa pagdugang sa pondo kamawotan pa kan saindang Chapter na magkaigwa nin bagong building asin madugangan an saindang staff nin huli ta dakulang challenge para sa sainda tuyong igwang nag-aabot na kalamidad.
Sa ngunyan, pigsierto kan opisyal na padagos an saindang paghahanap nin paagi tanganing makapaghatod nin serbisyo sa mga tawo.
