Posible soboot bisitahon ni President Ferdinand Marcos Jr. an White House tanganing makipaghilingan ki US President Donald Trump sa mga masunod na bulan.
Sigun ki Philippine Ambassador Jose Manuel Romualdez, an pagbisita ni Marcos an posibleng i-scheduled makalihis an pagbisita ni US Defense Secretary Pete Hegseth sa Pilipinas sa Marso 28 hasta 29 kun saen nakatalaan ining makipaghilingan ki Presidente Marcos asin Defense Secretary Gilbert Teodoro.
Pigsaysay man kan US Department of Defense na an pagbisita ni Hegseth an tanganing mas papusugon pa an kooperasyon sa seguridad sa pag-ultanan kan duwang nasyon.
Apwera digde, nakatalaan man na magbisita si US Secretary of State Marco Rubio sa bulan kan Abril.
Dugang pa ni Romualdez padagos an pakikipag-negosasyon ni US President Trump para sa untuk putukan sa pag-ultanan kan Russia asin Ukraine.
Marurumduman, pigbati ni Marcos si Trump sa pagtukaw kaini komo bagong Presidente kan Estados Unidos.
An United States asin Pilipinas an igwang haloy nang alyansa kabali na digde an mutual defense treaty na nagtutugot sa US military na magtago nin mga ekipahi sa siyam na base militar kan nasyon.
