NAGA CITY- Narekober kan mga personahe nin Presentacion MPS an nasa 12 na pidaso kan Coco Lumber na inabandona sa may parte kan Barangay Ayugao sa banwaan kan Presentacion.
Sa entrevista kan Bombo Radyo Naga ki PCPL Dennis Baylon, Assistant Police Community Relations, Presentacion MPS, sinaysay kaini na kan nakalihis na Marso 18, 2025 pasado alas 3:55 nin hapon kan mahiling an nasambitan ng mga Coco Lumber na manlaen-laen an sukol mantang nagsasagibo nin intel monitoring an mga personahe kan nasambitan ng hepatura.
Sigun sa opisyal, antes an insidente igwang nagpapadara nin mensahe sa saindang hotline kun saen pigpapa-abot an dapit sa pagputol o pagtransport kan nasambitan ng klase kan kahoy na mahigot man na ipinagbabawal sa irarom kan batas.
Dugang pa ni Baylon, mayo sindang naabutan na tawo asin sulamenteng an inabandonang coco lumber sana an yaon sa lugar.
Marurumduman, sa irarom kan RA 8048 o Coconut Preservation Act ipinagbabawal an pagputol kan nasambitan ng klase kan kahoy orog na kun mayong permit gikan man sa Philippine Coconut Authority.
Katakod digde, pigheras man ni Baylon na kan nakalihis na Pebrero igwa naman nangyari kan siring na insidente asin dati pa igwa naman nadakop asin nakasuhan huli sa pagbalgar sa ley.
Paliwanag kan opisyal, an coco lumber an pigpapabakal kan iba tanganing magkaigwa nin kwarta maski pa ini an mahigot man na ipinagbabawal.
Sa ngunyan, pigsierto na sana ni Baylon na dagos-dagos an saindang mahigot na pagbabantay sa saindang banwaan orog na ta nararani na an 2025 midterm elections.
