Hurot kan bagong halal na Colombian President Abelardo de la Espriella ki US President Donald Trump na paramientras na suspendehon an mga tariff na ipinapataw sa mga produktong hale sa Colombia, mantang nagbabangon an nasyon mula sa mapaminsalang linog.
Nagsakat sa 12.5 % poon sa 10% an tariff sa mga produktong Colombian kan huring parte nin Hulyo, bagama’t may pirang exemption kabali an kape asin langis.
Segun kay De la Espriella, hiniling kaini kay Trump na para mientos na halion an halangkaw na tariff tanganing matawan nin ginhawa an mga negosyanteng Colombian na lubhang naapektaran kan linog.
Sinabi kan Colombian leader na nakipag-ulay ini kay Trump nin poco mas o menos 10 minuto asin nagpahayag an US president kan pakikiramay sa mga nagadan sa 7.4 magnitude na linog kan Lunes.
Haros 300 katawo an nagadan asin nasa 13,000 harong an nawasak kan linog na nagtama sa mga ciudad nin Cali asin Pereira sa kanlurang Colombia.
Si De la Espriella, sarong milyonaryong abogado na nagin politiko, an sinuportahan ni Trump sa pagdalagan kaini sa pagkapangulo.
Matapos magtukaw sa puwesto asin mapalitan si dating leftist President Gustavo Petro, nagsali si De la Espriella sa inaapod na “Shield of the Americas,” sarong anti-cartel alliance na pinamamayuhan ni Trump asin binubuo kan mga pro-US na pamahalaan sa Latin America.
Plano din ni De la Espriella na magbuo nin military alliance kaiba an United States asin Israel tanganing pakusugon an kampanya kan Colombia laban sa mga guerrilla groupss.
