Pig-angat ni Senate Deputy Minority Leader Risa Hontiveros si Pangulong Ferdinand Marcos Jr. na pangenotan an pagsasairarom sa lifestyle check sa tahaw kan kontrobersiya asin imbestigasyon katakod kan maanomalyang flood control projects.
Sa sarong pulong-balitaan, pighurot ni Hontiveros na kun nagsugo an Presidente kan lifestyle check sa mga opisyal kan gobyerno, nararapat sana na magpahiling ini nin halimbawa sa paagi kan pagsasapubliko kan saiyang Statement of Assets, Liabilities, and Net Worth (SALN).
Mientrastanto, pigtawan-duon ni Hontiveros na kun limitado sana sa Ehekutibo an ipinagsugo na lifestyle check ni Presidente Marcos, pwede man na kusang-loob na makisumaro digde an Kongreso asin Hudikatura.
Sigun sa saiya, igwang kapangyarihan an Senate President, House Speaker, asin Chief Justice kan Korte Suprema na enkaminaron an mga senador, Kongresista, asin mahistrado na ilantad sa publiko an saindang SALN asin ipasuri an saindang pamumuhay.
Pwede soboot mangenot sa siring na lakdang an minority bloc, kun saen kaibahan kaini sinda Senate Minority Leader Vicente “Tito” Sotto III asin sinda Senators Loren Legarda, Panfilo Lacson, asin Juan Miguel Zubiri.
Kun maisasakatupadan an lifestyle check, saro sa mga posibleng mamayo digde Iyo an Office of the Ombudsman, siring kan nakagawian sa mga nakalihis na panahon.
Enot na mang sinaysay ni Senadora Imee Marcos na dapat mangenot an mga lehislador na magsairarom sa lifestyle check.
Sigun ki Marcos, komo lider kan nasyon, dapat sinda an mangenot sa direktiba kan Presidente sa lifestyle check sa mga opisyal kan gobyerno.
