NAGA CITY- Pigkua suboot kan saarong preso na pagkakataon an pagigin sibot kan mga pulis sa piglatag
na seguridad sa balik-eskwela para na makadulag sa lock-up cell kan PNP sa banwaan nin Bombon, Camarines Sur.
Pigbisto an suspek na si Jerome Sarion, 25-anyos na nahahampang sa kasong robbery.
Sa nagunong impormasyon kan Bombo Radyo Naga, napag-araman na nabukasan suboot ni Sarion an duwang dakulang padlock kan custodial facility kan PNP-Bombon gamit an sarong aluminium wire.
Alagad, huli ta mayo suboot ining pamasahe para makapasiring sa harayong lugar, nagbwelta na sana an suspek sa saindang harong.
Pigtutubudan na huli sa labing kapagalan sa pagdulag sa mga pulis kun kaya nakaturog ini asin nanutaran kan mga nagrespondeng otoridad na nagin rason tangani na liwat na maarestar.
