Nagbagsak na nin 50% an presyo kan kamatis sa mga mayor na merkado, basado sa report kan Department of Agriculture (DA).
Segun pa ki DA Asec. Arnel De Mesa, gikan sa dating P240 kada kilo kan nakalihis na semana, nag abot na sana sa P120 an kada kilong presyo kan kamatis sa mga bakalan ngunyan na semana.
Ini an harayo na gikan sa dating P350 hasta P360 na kada kilong presyo sa paglaog kan 2025.
Enot nang pigkarkulo kan DA na sa pagtatapos kan Enero 2025 o enot na parte kan Pebrero 2025, pwedeng magbalik na sa normal an presyo kan kamatis.
Katwiran kan ahensiya, naapektaran an supply kan kamatis sa huring parte kan 2024 huli na man sa magkakasunod na raot nin panahon alagad kasabay kan padiit diit na anihan sa mga probinsyang pangenot na supplier kan kamatis, nagbabalik na man an normal na supply.
Basado sa datus kan DA, hasta sa 45% kan tomato production an naapektaran sa mga magkakasunod na bagyo.
