Namamatean na an paglangkaw nin presyo kan mga kandila asin burak pirang aldaw antes an pagkomemorar kan Undas.
Sa kandila, an barakalan ngunyan kan tolong pidaso kan sadit na kandila sa palibot kan Manila North Cemetery (MNC) an P40 na. Nasa P50 man an medium size kada duwang pidaso mantang an large an P50 an kada sarong pidaso. Kada duwang pidaso man kan extra large na kandila an nagpapatak nin P150 kun saen nasa P60 kandila na nasa sadit na baso.
Sa barakalan man kan burak, an presyo kan radus, nasa P250 an bundle, P200 an carnation, P150 an malyasian mums asin P180 an stargazer. Nagkakantidad nin P800 hasta P2,500 mabinili an burak na may stand depende sa disenyo asin sukat.
Piglalaoman na malangkaw pa an mga presyo kan mga burak mantang paparani an Undas hasta sa mismong aldaw sa Nobyembre 1 asin 2.
