Mayong na-monitor an Department of Trade and Industry (DTI) na paglangkaw sa presyo kan school supplies sa tahaw kan halangkaw na demand kasabay kan liwat na pagbubukas nin klase ngunyan na Lunes, Hunyo 16.
Sigun ki DTI Sec. Ma. Cristina Roque, ini an basado na man sa isinagibo kan ahensiya na price monitoring sa mga nagtitinda nin school supplies.
Sigun sa sekretaryo mayo man na inisyuhan nin warnings nin huli ta nag sunod man an mga vendor sa pigtalaang price guide kan ahensiya para sa school supplies.
Kan nakalihis man na Dominggo, June 15, personal mismo na nagpasiring an sekretaryo sa mga tindahan kan school supplies asin bookstore sa syudad nin Maynila para sa price monitoring.
Mientrastanto, sa ibong kan halangkaw na demand sa school supplies, pigsierto kan pirang tindera na igwang bastante na suplay kan mga gamit sa eskwela.
