Inalmahan kan grupo kan mga parasira na Pambasang Lakas ng Kilusang Mamamalakaya ng Pilipinas (Pamalakaya) an pagbagsak kan presyo kan tawilis (Sardinella tawilis) sa P100 kada kilo puon sa dati kaining presyo na P250, kasabay kan mga report na an mga lawas kan nawawarang sabungeros an pig-apon sa Taal Lake.
Sigun sa Pamalakaya, nakaresebir sinda nin mga report sa nagkapirang banwaan sa Cavite na an tawilis an pigpapabakal sa pinakahababang presyo sa P100 kada kilo.
Ipinahayag man kan grupo an pagkahadit kan mga parasira gikan sa mga banwaan sa palibot kan Taal Lake sa Batangas, na nakaka-eksperyensiya nin pagkatakot an publiko sa pagbakal nin sira gikan sa lugar.
Pahayag ni Fernando Hicap, Presidente kan Pamalakaya, kun siring soboot an presyo kan tawilis sa merkado, sierto na mabagsak an farm-gate price kaini para sa mga parasira sa Taal.
Alagad maski enot nang sinaysay kan Bureau of Fisheries and Aquatic Resources (BFAR) na salbadong kakanon an sira gikan sa Taal Lake, alagad sigun ki Hicap nakakaapektar pa man an presyo kan tawilis huli sa mga report na igwang mga lawas na inapon sa lawa.
Pighagad man ni Hicap sa Department of Agriculture asin BFAR na magtao nin tabang sa mga parasira sa paagi kan direktang pagbakal kan saindang produkto asin enkaminaron an publiko na padagos na suportaran an mga parasira sa Taal.
Marurumdumang enot nang nagpuon an mga technical driver gikan sa Philippine Coast Guard kan retrieval operations sa Taal Lake kan nakalihis na Biyernes tanganing hanapon an mga lawas kan nawawarang sabungeros na nawawara puon pa kan nakalihis na Abril 2021 hasta Enero 2022.
