Sinaysay kan Department of Agriculture (DA) kan nakalihis na aldaw na nakahiling ini nin paglangkaw sa farm gate prices kan paroy sarong semana makalihis man na ianunsyar ni Presidente Ferdinand Marcos Jr. an duwang bulan na suspensyon kan rice importation magpuon Setyembre 1, 2025.
Sa pahayag, sinaysay kan DA na basado sa datos kaini gikan sa National Food Authority (NFA), na an farm gate prices o presyo na nareresiber kan mga paraoma sa pagpapabakal nin mga produkto antes na ibyahe asin man ipabakal sa tawo an nagpuon ng maglangkaw sa anom sa 13 key rice-producing regions.
Basado sa monitoring kan NFA, an buying prices para sa dry palay an naglangkaw nin 0.3% hasta sa 2.6% antes na ipagsugo ni Marcos an import ban sa Central Luzon, Bicol, Central Visayas, asin nagkapirang parte kan Mindanao.
Susog pa sa DA, an average prices an gikan sa P16.98 kada kilo saCentral Luzon hasta P20.59 sa Southern Mindanao, mantang steady naman an presyo sa P16.52 sa Southern Tagalog asin man P17.60 sa Western Visayas.
Sa ibong man kaini, nagbagsak man an presyo kan paroy sa Ilocos, Cagayan Valley, Eastern Visayas, Northern Mindanao, asin BARMM, asin an pinakahababa an nasa P14.43 kada kilo sa Cagayan Valley asin man an pinakahalangkaw an nasa P21.67 sa BARMM.
Sinaysay ni Agriculture Secretary Francisco Tiu Laurel Jr. na mahigot na minomonitor kan gobyerno an reaksyon kan merkado sa import ban na ipinagsugo makalihis mahiling an presyo kan paroy an nagbaba nin hasta sa P8 kada kilo na mas hababa sa estimated production cost na P12 kada kilo kan mga paraoma.
Marurumduman na nagbaba an presyo kan bagas sa pankinabang merkado ngunyan na taon kumparar kan nakalihis na taong 2024 makalihis man na halion kan India an export ban kaini sa non-basmati rice.
Kan nakalihis man na Abril asin Mayo, nagbakal an mga importer nin haros 970,000 metriko tonelada nin bagas. Sigun ki NFA Administrator Larry Lacson, an mayor na obheto kan nasambitan ng import ban an matawan pagkakataon an presyo nin paroy sa level na mataong bastanteng kita sa mga paraoma.
