NAGA CITY- Pigreport kan DTI-Camarines Sur na mayo man paghiro sa presyuhan kan kandila ngunyan na Undas 2025 partikular sa probinsiya kan Camarines Sur.
Sa entrevista kan Bombo Radyo Naga ki Jay Percival Ablan, Provincial Director kan DTI-Camarines Sur, sinaysay kaini na basado sa saindang pagmonitor na mantinido an presyo kan kandila sa presente sa ibong kan kasiributan.
Katakod kaini, nagpapakol an pinakasadit na kandila sa P5 mantang an iba man nag-aabot sa P50 hasta sa P200 depende sa sizes kan mga ini.
Saro soboot sa saindang pigmomonitor iyo an price tag huli ta nagseserbe ining giya kan mga consumer.
Sigun pa ki Ablan, mas nagdakol an influx kan mga produkto huli sa Undas kun saen basado soboot sa latest report, nag-abot sa 3 hasta 5 an sizes kan kandila na pigpapabakal sa mga tindahan sa presente na igwang manlaen-laen na kolor asin parong.
Dugang pa kan opisyal, dae naapektaran kan Undas an presyuhan huli ta stable ini sa ngunyan.
Mientrastanto, nagheras man nin tips an opisyal sa kun pano makakatipid an publiko sa paggamit nin kandila siring na sana kan pagbugtak kaini sa sarong container o baso huli ta nagkakaigwa soboot ini nin mas halawig na life span.
Apwera digde, yaon man an de-baterya na kandila na saro sa mga nauuso na ginagamit naman kan nagkapira bako sana tuyong Undas kundi sa nagkapira pa na okasyon.
Alagad liwat man na nagtapanid an opisyal na pirmeng i-check an nababakal tanganing dae paggikanan nin mga problema.
Siringman, liwat na pigtawan duon ni Ablan na dae sakop kan saindang ahensiya an pagmonitor sa presyuhan kan burak huli ta susog sa Price Act kandila sana an saindang pigbabantayan.
Sa ngunyan, pigsierto man kan opisyal na mayo pa man nagbalgar sa panundunan na piglatag kan DTI-Camarines Sur.
