Pigkumpirmar ni Priscilla Meirelles, Miss Earth 2004, na ini asin an actor na si John Estrada an divorce na, sarong taon makalihis na enot na ipahayag an saindang pagsuhayan.
Sa sarong entrevista, sinaysay ni Priscilla na nahanap na kaini an katuninongan asin kaogmahan sa saiyang buhay, asin preparadong isarado an kabanata kan saindang relasyon.
Pigheras pa kan beauty queen na nagsunad ini nin divorce sa Brazil kan 2024, antes pa man nagtao nin pahayag kan 2025 kun saen saiyang sinabi na legal pa sindang mag-agom kaidto ni Estrada.
Sigun ki Priscilla, nag-abot an desisyon makalihis na marealisar na mayo nang padudumanan an saindang pag-iibahan.
Pigheras man kaini an nagin reaksyon ni John, na dae naogma sa saiyang desisyon. Pigpurbaran man soboot nindang pakarhayon an relasyon sa tabang kan psychiatrist asin pag-atender sa simbahan, alagad dae na ini nagin matrayumpo.
Pigsambit pa ni Priscilla na ginibo kaini an desisyon bako sana para sa saiya kundi para man sa saiyang aking babae na si Samantha Anechka.
Nagsuba pa si Priscilla dapit sa ibang mga tawong nagin parte sa pagkaraot kan saindangrelasyon alagad piglinaw na bako sana ini an sulamenteng rason kan saindang pagsusuhayan.
