Prayoridad kan Department of Agriculture (DA) ngunyan na 2026 an produksyon kan sili tanganing mapapusog an suplay asin presyo, orog na sa panahon kan tag-uran na kun saen nararaot an mga pananom huli sa bagyo.
Pigtawan-duon ni Agriculture Secretary Francisco P. Tiu Laurel Jr. an pangangaipuhan kan baseline data sa konsumo sa nasyon asin Metro Manila, presenteng produksyon, asin karaniwang ani kada ektarya.
Plano kan DA an pagpapahewas kan climate-resilient na pagtatanom, kaibahan an mga greenhouse asin typhoon-resistant na estruktura, tanganing proteheran an mga pananom kontra sa makusog na uran asin baha.
Papupusugon man an access sa de-kalidad na planting materials siring kan siling labuyo, siling pansigang asin grafted bell peppers sa paagi kan Gulayan sa Bayan program.
Kaibahan an sili sa prayoridad na high-value crops kaibahan kan munggo, na may obhetong pababaon an presyo asin bawasan an import. Piglalaomang makikinabang an mga restaurant, food processors, asin retailers sa mas matatag na produksyon kan sili, dahil mababawasan an biglaang paglangkaw kan presyo sa panahon kan halangkaw na demand.
