Pig-omaw ni Deputy Speaker Paolo Ortega V si Majority Leader Ferdinand Alexander “Sandro” Marcos sa pagmantinir kan produktibidad kan Kamara de Representantes sa ibong kan pag-asikaso sa mga reklamo kan impeachment.
Sigun ki Ortega, sa irarom kan pamamayo ni Marcos asin Speaker Faustino “Bojie” Dy III, dae napauktaba an pagpasa sa mga prayoridad na prosopwesto asin importanteng resolusyon maski nahahampang an kapulungan sa mga seryosong responsabilidad pang-konstitusyonal.
Kabali sa mga pigbubusol ni Marcos an minasunod: HB 7432 (No Work, No Pay for Members of Congress) na obhetong ikonektar an sweldo kan mga lehislador sa saindang pag-atender sa mga sesyon asin hearing.An HB 7443 na obhetong halion an travel tax tanganing pakusugon an turismo sa nasyon.
Apwera digde, pig-aprubahan man sa ikatolong pagbasa an importanteng mga bill siring kan Energy Systems Storage Act (HB 6676) para sa mas pusog na suplay kan kuryente, asin an mandatory insurance para sa mga electrical asin telecom line workers (HB 7239).
Nagpapausog man an Kamara nin mga resolusyon para sa mga lokal na holiday, pagbisto sa mga atletang Pilipino, asin pagtataong onra sa nagtalikod na sa kinaban na si dating Speaker Jose De Venecia Jr.
Sigun ki Ortega, an dagos-dagos na pag-apruba sa mga ley an patotoo sana kan disiplina kan institusyon sa tahaw kan saindang oversight functions.
