NAGA CITY- Pigtawan duon kan sarong propesor sa siyudad nin Naga na an aldaw kan Nobyembre 30 kada taon an pagrumdom sa signipikanteng kontribusyon ni Andres Bonifacio sa kun ano an nasyon sa presente asin man sa pigtatamasang katalingkasan.
Sa entrevista kan Bombo Radyo Naga ki Prof.Leo Paulo Imperial, President kan Nueva Caceres Heritage Movement Inc., sinaysay kaini na an ngunyan na aldaw an pagkomemorar sa ika-161 na kapangakian ni Andres Bonifacio na pigbisto man komo Ama kan Katipunan.
Sigun ki Imperial, an mga jovenes sa presenteng panahon an marekas makakakua nin impormasyon dapit sa mga pigkokonsederar na heroe kan nasyon alagad an saindang pagkasabot an naiimpluwensiyahan man kan manlaen-laen na opinyon kan iba.
Paliwanag pa kan Professor, mayo man pigtalaga talaga na National Heroes sa Pilipinas, alagad si Dr. Jose Rizal an pighihiling na nagrerepresentar sa ladawan kan Pambansang Bayani huli sa saiyang rekognasyon kumparar sa ibang mga heroe.
Dugang pa ni Imperial labi an nagin impact ni Bonifacio sa nasyon nin huli ta sa ibong kan pagigin simpleng tawo kaini naka-kriar man giraray nin dakulang pagbabago sa Pilipinas orog na sa pagkua kan katalingkasan para sa presenteng henerasyon.
Sa ngunyan, pig-enkaminar na sana kaini an publiko na magtaong respeto sa gabos na mga heroe na nagbuwis kan saindang buhay para sa nasyon.
