NAGA CITY- Pigpaliwanag kan sarong Professor sa Agrikultura an mapadapit sa pig-aapod na Beekeeping.
Sa nagin paghampang sa mga kagawad kan media ni Dr. Amelia Nicolas, PHD Professor VI, CANR, CBSUA-Pili, sinaysay kaini na an saindang eskwelahan igwang pigtatangro na subject asin parte kan saindang curriculum an pagtukdo sa pag-aataman kan mga bubuyog.
Sigun ki Nicolas, tuyong bulan kan Marso, Abril asin Mayo kun saen ini an pig-aapod na summer season kadakol na mga kahoy, pananom an nagbuburak na nagseserbeng sources kan pagkakan kan mga bubuyog.
Ini man an pighahalat na panahon kan mga stingless beekeepers nin huli ta bistado man ini komo honeyflaw season.
Dugang pa kan opisyal, kadakol na an mga mapo-produce na produkto gikan sa mga bubuyog siring na sana kan pot honey asin iba pa na dakulang katabangan sa kita kan mga nag-aataman kaini. Siringman an mga produkto na ini an nakakatabang nin marhay sa salud kan mga tawo na nagkukunsumo kan mga produkto na gikan man sa mga bubuyog.
Katakod digde, pigsaysay man ni Nicolas na igwang maraot na epekto an labing init kan panahon sa mga bubuyog kun kaya saindang pig-aabisuhan an mga beekeepers na tawan nin lindong an saindang mga ataman tanganing dae deriktang masildangan kan aldaw.
Mientrastanto, masasabi man soboot ni Nicolas na matrayumpo an saindang eskwelahan pag-abot sa agrikultura nin huli ta pigmirar sinda komo centers for development in agriculture sa bilog na Bicol Region na nagpapatotoo sana sa saindang dedikasyon sa ladangan na ini.
Sa ngunyan, pigsierto na sana kan opisyal na padagos man an saindang pakikipagtabangan sa mga state universities asin colleges tanganing maipromoter an Agrikultura.
