NAGA CITY- Padagos na pigpapautob kan Calabanga MPS an saindang pig-aapod na Project Maria.
Sa entrevista kan Bombo Radyo Naga ki PLTCOL. Lydelfo Rafil, Chief Police kan Calabanga MPS, sinaysay kaini na an nasambitan ng programa an saindang kasimbagan sa padagos na paglangkaw sa kaso kan panlulugos sa saindang banwaan.
Sigun ki Rafil, sa bilog na Camarines Sur an Calabanga an igwang highest rape incident na maikokonsederar na dakulang problema.
Katakod digde, sa paagi kan Project Maria, pigbibisita an kada barangay sa banwaan kan Calabanga tanganing i-discuss sa mga residentes kun pano nangyayari an panlulugos, ano an mga dapat gibuhon tanganing malikayan ini asin siisay an dapat na apudan o dulukan enkaso magin biktima.
Sa paagi soboot kaini, natatawan nin magkakanihgong kaaraman an mga tawo asin magin aware sinda kun pano malalaban an problema sa mga insidente kan panlulugos.
Mientrastanto, kasabay man kan liwat na pagbwelta kan mga estudyante sa mga eskwelahan pigsierto man kan opisyal an saindang pagpapahigot pa kan police visibility asin pagbabantay tanganing malikayan an anuman na mga insidente na pwedeng magbungkaras.
Sa ngunyan, pig-enkaminar na sana ni Rafil an saindang mga residentes na ireport sa saindang opisina an anuman na klase kan pang-aabuso tanganing tolos na maaksyunan asin dae na maglala pa an problema.
