Pigpatanid kan civilian coalition na nakatutok sa mga kapakanan asin karapatan kan mga parasisirang Pilipino sa West Philippine Sea na Atin Ito an “political stunt” kan China.
Ini an kasunod kan pagtabang kan mga personnel kan Chinese Navy warship sa sarong parasisirang Pilipino kan nakalihis na Pasko, Disyembre 25.
Sa sarong statement, sinaysay ni Atin Ito co-convenor Rafaela David na saindang binibisto an tungkuling tabangan an mga nasa distress na kamugtakan sa dagat, alagad an ginibo soboot kan China an bakong sarong humanitarian assistance kundi sarong pagpapabango kan saindang imahe.
Soboot, saro ining propaganda-driven assistance na obhetong ilihis an gabos gikan sa pirang taong panghaharass, kadahasan asin iligal na panghihimasok kan China sa mga katubigang sakop kan Pilipinas.
Binatikos man ni David an claim kan China na tulong aldaw na nawawara an parasisirang Pilipino na nilinaw soboot kan Philippine Coast Guard (PCG) na salbado na nakaangkla sa sarong payao mantang naghahalat na ma-retrieve kan saiyang mother boat.
Kinuwestyon man kaini an pagpapatroliya kan Chinese navy ship sa laog kan exclusive economic zone (EEZ) kan Pilipinas.
Mayo nin ano man na gibuhon nin pagtabang an pwedeng magpahintulot sa panghihimasok asin dae mapupura kan pagpapahiling nin karahayan an mga gibuhon nin harassment asin man kadahasan sa mga katubigan.
Katakod man kaini, nagpatanid man an Atin Ito laban sa pagpoporbar kan China na linigon an haloy ng pangaabuso kaini sa paagi kan sarong “highly publicized incident,” kasabay kan pagirumdom sa mga insidente kan pambobomba kan mga barko kan China Coast Guard sa mga parasisirang Pilipino sa Escoda Shoal asin pagsasagibo kan peligruso na maniobra na ikinalugad kan tulong Pilipino asin ikinadanyar kan duwang bangkang pangsira.
Sa huri, pighurot kan koalisyon na dae maikakaila kan propaganda-driven assistance kan China an pagbalgar sa international law, asin dae ini maabswelto sa padagos kaining panghihimasok.
