Pigsunad ni Rep. Khymer Adan Olaso kan Zamboanga City 1st district sa Kamara an House Bill 11211 o an Death Penalty for Corruption Act o prosopwestong patawan nin kapadusang kagadanan sa paagi kan “firing squad” an mga opisyal kan gobierno na mahahatulan kan Sandiganbayan sa mga kasong graft and corruption; malversation of public funds; asin plunder.
Enkaso magin ganap na ley, masasakop digdi an gabos nin public officials, puon sa Presidente kan nasyon hasta sa mga opisyal kan mga barangay. Siringman, an iba pang mga nasa Ehekutibo, Lehislatura asin Hudikatura; constitutional commissions; GOCCs; pati mga miyembro kan Armed Forces of the Philippines o AFP asin Philippine National Police o PNP.
Pig-tukoy sa prosopwesto an pirang safeguards, kun saen sisiertohon an “due process” asin proteksyon, asin an mga hatol an posibleng isakat sa Korte Suprema tanganing maisairarom sa review, asin tutugotan an mga akusado na gamiton an anuman na legal remedies na igwa.
Punto sa explanatory note kan House Bill, an kurapsyon an nagtitinir na saro sa matinding banta sa social, economic asin political development kan Pilipinas. Asin sa ibong kan kadakol na ley, nagpapadagos an kurapsyon, salang paggamit nin pondo, asin pagtataksil sa tiwala kan publiko.
Enkaso man maisaley ini, magigin makusog na mensahe ini kan Kongreso dapit sa importansya kan accountability, asin an kurapsyon an dae pigkukunsinti.
Mientrastanto, nakaguno man nin manlaen-laen na opinyon kan mga Pinoy katakod sa liwat na pagbuhay kan nasambitan ng prosopwesto.
Sa survey na isinagawa kan Bombo Radyo sa hapot kun ‘tugot na ipautob an firing squad sa mga tiwaling kawani kan gobyerno’ nagluwas na kadakol pa man sa mga Pinoy an nag-uyon sa prosopwestong ley na House Bill number 11211 o an ‘Death Penalty for Corruption Act’.
Kun saen pira sa mga ini an nagtao nin sintimyento na tanganing malikayan an agawan o iwal sa politika tanganing an mga marhay na tawo asin tapat sa sadili asin serbisyo sana an makandidato. Apwera digdi, igwa man nin nahahandal na mapuli sana sa mayo an prosopwesto nin huli ta an enot soboot na matatamaan kan ley na ini an mga nasa kongreso. Nagkapira man an mawot ibali an mga naeembwelto sa iligal na droga.
