NAGA CITY – Tinawan duon kan Philippine Statistics Authority(PSA)-Camarines Sur na dai ninda masisierto kun may magigin pagbabago sa inflation rate sa masurunod na bulan huli sa pag-uran.
Sa entrevista kan Bombo Radyo Naga ki Paul P. Aspe Jr., Supervising Statistical Specialist asin officer-in-charge kan Philippine Statistics Authority-Camarines Sur, dai soboot kaini masisierto an magigin pagbabago sa inflation nin huli ta maski tapos na an El Niño papaabot naman an La Niña.
Dugang pa kaini, sa presente dai ta pa aram kun ano an magigin epekto kaini sa satuyang agrikultura.
Dai man soboot kaini masisimbag kun masakat o mababa an inflation alagad pigduon kaini na may mga magigin epekto an kondisyon kan satuyang panahon sa presente. Sigun pa ki Aspe nakakaapektar man sa inflation an mga polisiyang pinapautob kan gobyerno.
Dugang pa kaini, sa presente nasa maray man nin kondisyon an trend kan satuyang inflation. Pag-abot man sa epekto kan panahon, kadakul soboot nin factors igdi siring kan epekto kaini sa mga produktong agrikultura, alagad dai man soboot tulos-tulos an impact kaini.
Kun magbaba man sigun ki Aspe an produksyon huli sa La Niña, may magigin epekto ini sa supply asin demand, asin mahihiling man an epekto kaini sa masunod nin semestre huli ta yaon igdi an mga holiday siring kan Christmas asin iba pang selebrasyon.
Dugang pa kaini may pigsasagibo man nin mga lakdang an mga ahensya siring kan Department of Trade and Industry asin Department of Agriculture tangani na ma-caution kita sa mga nasambitang epekto.
Ini soboot an mga rason kun tano dai pa kaini masasabi kun makawsa nin pagsakat o pagbaba kan inflation sa sarong nasambitang peryodo.
