Pinag-aadalan ngunyan kan Philippine Statistics Authority an paglalaog nin pirma sa disenyo kan National Identification (ID) card.
Ginibo kan ahensya an pahayag sa isinagibong pagdangog kan senado sa 2025 budget kan National Economic and Development Authority. Digdi an nahapot ni Senador Grace Poe an NEDA kun ano an saindang ginibong lakdang tanganing masimbagan an mga reklamo kan pirang indibidwal na nakaresiber nin premirong disenyo kan ID card.
Reklamo kan pira, dae pig-aako kan ibang establishment asin pirang bangko huli sa kawaran kaini nin pirma. Sinimbag man ini ni PSA Chief Dennis Mapa asin sinabing naghahanap na sinda ngunyan nin bagong contractor na mag-iimprenta kan mga National ID card asin kaiba na an pirma sa magigin disenyo.
Paliwanag kaini na posible namang ipa-update kan mga ID holder na mayong pirma an saindang physical ID card.
Mientrastanto, dae pa soboot aram kan saindang ahensya kun magpapataw sinda nin bayad sa mga mawot na magpa update.
Pigtutuloan man ini ni Poe, asin sinabing bako man kasalan kan card holder kun mayong pirma an saindang ID.
Basado sa datos kan PSA, mapakol na sa 55 million physical National ID cards an matrayumpo na na print kan dating service provider kan BSP na AllCard Inc,. Maabot na man sa 53.5 million ID cards an na deliver kan ahensya.
