NAGA CITY – Naka deploy na an mga personahes kan Public Safety Office Naga komo pagtataong asistensya sa mga kasiributan ngunyan sa syudad nin Naga.
Sa nagin paghampang sa mga kagawad kan media ni Renne Gumba, pamayo kan PSO-Naga, sinaysay kaini na nakaantabay na an saindang mga personahes para sa mga aktibidad na ikokondusir sa Naga kabali na an mga graduation asin iba pa orog na sa eksaminasyon na isasagibo sa maabot na Dominggo na pinaglalaoman na dadagsaon nin kadakol na mga examinees.
Saro pa sa saindang pinagpeprepararan an isasagibo na pride march na ikokondusir sa maabot na Sabado na papartisiparan kan mga miembros kan LGBTQIA+ community.
Komo pakikisumaro kan syudad sa nasambitan ng aktibidad pigpuntarahan nin kolor rainbow na saro sa simbolo kan grupo an nagkapirang pedestrian sa Naga.
Dugang pa kan opisyal, naglalaog naman an saindang mga preparasyon para sa Penafrancia asin sa Bar Examination enkaso liwat ining isagibo sa Naga. Katakod man kan pagbubukas na kan school year 2024-2025 sa masunod na bulan, igwa naman nin mga eskwelahan na naghagad sainda nin asistensya para sa pagmanihar nin trapiko.
Alagad huli sa limitadong personahes enkaso na dae soboot ninda kayanon an mahagad na sinda nin tabang sa barangay asin sa mga gwardiya kan mga ini.
Sa ibong na lado, padagos man an pagtataong asistensya asin tabang kan PSO sa mga kapulisan orog na pag-abot sa pagtataong seguridad asin kaayusan sa syudad nin Naga.
