Mawot pakusugon kan Department of Social Welfare and Development (DSWD) an pagsasagibo nin mga psychological interventions kaini tanganing simbagan an naglalangkaw na numero kan teenage pregnancy sa nasyon.
Ini an magigibo sa irarom kan ‘ProtecTEEN’ na programa kan nasambitan ng ahensya.
Sa naging datos kaya gikan sa Commission on Population and Development (CPD) nasa kabilogan numero na 142,276 kan mga adolescent mothers an naikurit na nangaki kan 2023.
Pighayag kan Commission on Population and Development an nakakaalarmang paglangkaw sa numero kan mga aking ina na mayo pa sa edad na 15-anyos.
Mientrastanto, sa kabilogan numero na 2,411 na nangaki kan 2019, naglangkaw hasta sa 3,343 an numero kan mga nagbabados asin nangangaki na mga batang ina na nasa edad na 15-anyos pababa.
Sa ngunyan, nakaantabay an DSWD sa datos na ini kaya man katakod an ‘ProtecTEEN’ program ngunyan na taon. Enot namang nagpuon an pilot testing kaini sa mga probinsiya kan Malaybalay, Bukidnon asin sa Antipolo City.
