Pig-abisuhan ni dating Health Secretary asin ngunyan an House Deputy Majority Leader, Iloilo Rep. Janette Garin an publiko na magdoble ingat kontra sa naglalangkaw na kaso kan tinatamaan nin tuberculosis (TB) sa nasyon.
Mensahe ini ni Garin kasunod kan impormasyong iniluwas kan grupo kan mga doktor na Médecins Sans Frontières/Doctors Without Borders (MSF) na naglangkaw na sa 1,280 residente sa Tondo, Maynila an may helang nin TB. Sigun ki Garin, arog man kaini an naobserbaran sa saiyang inorganisang medical mission na Bantay Kalusugan sa Iloilo.
Nakakaalarma ini para ki Garin kaya dapat tulos na maghiro an gobyerno tanganing dae dagusang maglangkaw asin magkuriyat pa sa bilog na nasyon an helang na TB na nakakagadan kun dae tulos mabubulong.
Nakakahandal man sigun ki Garin na kulang an bulong para sa siring na klase kan helang kaya kaipohan na masierto kan Pilipinas na makakua nin bastante na bulong asin makakapagpautob nin marhay na sistema kan pagheheras sa gabos nin apektado.
