NAGA CITY- Nagpapadagos ngonyan an pigkokondusir na operasyon kan mga otoridad para madakop an sarong pigtutubudang pulis na yaon sa likod kan pambabadil gadan sa sarong soltero sa Daet, Camarines Norte.
Sa entrevista kan Bombo Radyo Naga ki PS/Supt. Cerillo Trilles, provincial director kan Camarines Norte Police Provincial Office (CNPPO), sinaysay kaini na hinahanap pa ngonyan an sarong pulis sa nasambitang probinsya na pigtutukdong suspek sa pambabadil gadan ki Jake Glipo, 28-anyos na nangyari sa nasambitang banwaan.
Basado sa inisyal na imbestigasyon kan PNP, nagluluwas na nagkaigwa nin dae pagkakasinbutan an dae pa pinapangaranang pulis asin an soltero na nagresulta sa pambabadil digdi.
Nagsayuma man si Trilles na magtao pa nin dugang na detalyes sa pangyayari para matawan dalan an pigkokondusir na imbestigasyon.
Sigon ki Trilles, apwera sa nasambitang pulis, pighahanap pa ninda ngonyan an sarong sibilyan asin duwang dae pa nabibistadong indibidwal na imbwelto suboot sa krimen.
Mientrastanto, susog sa impormasyon hale sa PNP Daet, binisto an imbweltong pulis na si PO2 Alvin Francis Villares na presenteng naka-assign sa San Vicente PNP sa Camarines Norte asin si Bernard Orias.
Sa ngonyan, sigon sa provincial director, inaandam na ninda an posibleng kaso na isasangat laban sa nasambitang pulis.
