NAGA CITY– Labi an pagkadismaya kan hepe kan Pamplona-PNP makalihis maembwelto sa extortion sa syudad nin Naga an saro sa saindang mga tauhan. Sa entrevista kan Bombo Radyo Naga ki P/Insp. Greg Bascuña kan Pamplona-PNP, sinaysay kaini na dae niya haros maisip na magigibo ni PO2 Gilbert San Juan Embestro an mangotong nin kwarta sa manlaen laen na parte kan probinsya nin Camarines Sur.
Sigon ki Bascuña, parte si Embestro kan intelligence group kunsaen dae man lamang niya narisa na igwa na ini nin pigigibong maraot kasabay kan mga pigkukundusir na imbestigasyon sa manlaen laen na kaso sa saindang banwaan.
Pigsierto man kan opisyal na dae niya papalagpason an pigibo ni Embestro urog na ta nagpapadagos an internal cleansing kan PNP.
Si Embestro an nadakop kasubanggi sa entrapment operation kan mga otoridad sa Naga City huli sa mga baretang nagpapabisto soboot ini komo miembro kan New People’s Army (NPA) para mangotong nin kwarta.
Napag-araman na igwa nang mga nabiktima an suspek sa mga banwaan kan Buhi, Pamplona asin sa syudad nin Naga.
Sa ngunian, pigpepreparar na an kasong isusunad kontra sa nasambitan ng suspetsado.
