NAGA CITY – Pigpuonan na kan mga kapulisan sa Naga City Police Office an inaapod nindang Pulisteniks.
Sa entrevista kan Bombo Radyo Naga ki PMAJ Alexander V. Brofas Assistant Chief, City Community Affairs and Development Unit, NCPO, sinaysay kaini na alinsunod sa nagin kasuguan ni PNP Chief PGen Nicolas Torre III, na magin slim na an lawas kan lambang mga kapulisan, kaya man pigbalik ninda giraray an dati nang programa kaidto na Balik Alindog orog na sa mga bagong pasa na mga personnel na kakaipuhanon na magsairarom sa tulong phases.
Kaipuhan na magkaigwa giraray nin training o exercise tangani mas mahubog pa an mga lawas kan kabuhan orog na sa lado kan mga kapulisan na naka-duty sana sa laog kan mga opisina.
Sigun ki Brofas, sa paagi kan pagigin matikas kan mga kapulisan, mas mapapadali an mga trabaho siring kan paghahabol sa mga kriminal na kun saen magigin kampante an publiko na magsarig sa sainda kada oras nin remalaso.
Importante na maray an kamugtakan kan salud bako sana sa mga PNP Personnel kundi magin sa ordinaryong tawo sana, nagkakanigo na matawan nin pokus an salud tangani makalikay sa ano man na klase nin kahelangan.
Pigtawan duon pa kan opisyal na dakulang benipisyu na regular na nababawasan an mga fats sa lawas, nareregulate an blood flow asin healthy an tawo tangani kumportable man na magpaparahiro orog na sa paggampan kan mga trabaho.
