Inatasan kan International Criminal Court (ICC) Appeals Chamber si Judge Luz del Ibañez Carranza na pangenutan an apelar na pigsunad kan kampo ni dating Presidente Rodrigo Duterte sa sarong desisyon na nagpapatibay sa hurisdiksyon kan tribunal sa saiya.
Sa sarong dokumento na may petsang Oktubre 29, hinirang kan limang miyembro kan Appeals Chamber si Ibáñez Carranza.
Ini an tinintaan ni Judge Erdenebalsuren Damdin, presidente kan Appeals Division. Nag-ugat ini sa desisyon kan ICC Pre-Trial Chamber 1 na sayumahan an hamon sa hurisdiksyon kaini kan defense counsel ni Duterte.
Pigsayuma man kaini an kahagadan kan depensa na ipagpauktaba an pagpapaluwas kan desisyon kaini sa hamon sa saindang nasasakupan.
Sigun sa website kan ICC, si Ibáñez Carranza an nagsirbi komo sarong senior national prosecutor sa espesyal na sistema kan Peru para sa pag-uusig kan mga krimen siring kan terorismo, grave violations of human rights, asin crimes against humanity.
Ini man an naghiro komo coordinator kan 17 prosecutorial agencies sa specialized system. Mientrastanto, sinaysay kan ICC na pirang beses ining hinirang komo sarong delegado kan Peru antes man an Inter-American Commission on Human Rights, Convention on the Elimination of All Forms of Discrimination Against Women, Inter-American Committee against Terrorism, asin iba pang mga representantes.
Parte man ini kan mga chamber na nagkapot sa mga kaso ni Ugandan resistance commander Dominic Ongwen asin Congolese rebel leader Bosco Ntaganda, na parehong napatotoohang nagkasala kan crimes against humanity sa hampang kan ICC.
Si Ibáñez Carranza an nagsisirbi komo sarong hukom kan ICC magpuon pa kan taong 2018. An saiyang termino an matapos sa 2027.
