Aram baya nindo mga ka-bombo, nakua an sarong Purple Heart na pagsasadiri kan World War II veteran gikan sa Illinois haros dekada na an nakakalihis sa sarong safety deposit box.
An nasambitan ng Purple Heart na pigtao ki U.S. Army rifleman James Bennett sa kasagsagan kan World War II, an napasakamot kan Illinois State Treasurer na si Michael Frerichs komo parte kan Operation Purple Heart.
Ini sarong programa na piglunsar tanganing maibalik an mga military medals gikan sa abandonadong safety deposit boxes sa saindang may-sadiri.
Sigun ki Michael dae madali an pagbalik kan medalya sa mga pamilya kan World War veteran orog na ta kaipuhan ninda kan masusing pag-trak down sa mga ini.
Katakod digde, an pamangkin ni James Bennett na si Patty Knies iyong nagreseber kan binalik na purple heart orog na ta ini an legal guardian kan saindang aki na si Susan na igwang labing kakundian.
Sigun ki Knies dae soboot kaini aram an dapit sa safety deposit box na nakapangaran ki Ann Bennett hasta sa apudan ini kan Illinois State Treasurer para sa nasambitan ng Purple Heart.
Mientrastanto, sa paagi kan sarong seremonya, pormal na pig turn over ni Michael an medalya sa nawalat na kapamilya ni James Bennett.
Sa ngunyan, ini na soboot an ika 17 na purple heart na saindang naibalik asin pigsierto na mapadagos sa saindang napuonan na adbokasiya.
