Naging ley na an bill na nagtataong poder sa presidente na bawasan o suspendiron an excise tax sa langis. Ini makalihis na pirmahan ni Presidente Ferdinand Marcos Jr an Republic Act No. 12316.
Sa lindong kan ley, tinatawan nin emergency powers an presidente na suspendiron o bawasan an excise tax sa mga produktong petrolyo, base sa rekomendasyon kan Development Budget Coordination Committee (DBCC) asin sa koordinasyon kan Secretary kan Department of Energy.
An kapangyarihan na ini pwedeng gamiton kun an presyo kan krudo sa internasyunal na merkado umabot o maglampas sa $80 kada bariles sa laog nin sarong bulan.
Susog sa ley, an suspensyon o pagbawas kan buwis pwedeng iimplementar sa mga partikular na produktong petrolyo. Pwede man ining iimplementar bilang bilog na suspension o parsial na pagbawas kan excise tax, depende sa nangingibabaw na kamugtakan sa ekonomiya asin presyo kan langis.
Lininaw man na dae malampas sa tolong bulan sa laog nin sarong taon an implementasyon kan suspension o pagbawas kan excise tax.
Parte ini kan mga lakdang kan gobyerno tanganing mapagaan an epekto kan padagos na paglangkaw kan presyo kan lana sa mga namamanwaan, partikularmente sa pamasahe, presyo kan barakalon, asin gastos sa transportasyon.
An ley magkakaigwa nin epekto kinseng aldaw pagkatapos na ini ipublikar sa Official Gazette o sa sarong peryodiko na may mahiwas na sirkulasyon.
