Mahigot na pigpapautobAn Republic Act No. 9995 o an Anti-Photo and Video Voyeurism Act of 2009 tanganing protehiran an privacy asin dignidad kan lambang indibidwal laban sa ilegal na pagkua asin pagpalakop nin mga pribadong retrato asin video. Sakop kan ley an apat na mayor na ipinagbabawal na gawe: pagkua nin mga retrato o video na mayong permiso, pagkopya o pag-reproduce kan materyales, pagpabakal o pagdistribwir kaini, asin pagpublikar o pag-upload kaini sa internet asin iba pang klase nin media.
Sa intrevista kan Bombo Radyo Naga ki Atty. Clarence Joseph M. Ronquillo, Trial Lawyer, segun sa ley, bako sana an tawong nagkua kan sensitibong litrato o video an pwedeng maninimbag. An siisay man na mag-share, mag-repost, o magpalakop kan siring na laog pwede man na kasohan dawa bako siya an orihinal na nagkua. Ipigduon na an simpleng pagpalakop nin pribadong materyales na mayong pagtugot kan personang nasa retrato o video pwedeng magresulta sa criminal liability.
An importansya kan pagtugot sa irarom kan RA 9995 ipinaliwanag man. An pagtugot na magrekord nin sarong pribadong momento dai nangangahulugan nin pagtugot na ihiras ini sa iba. Sa mga kaso nin inaapod na pornograpiya nin pagbalos, an siisay man na magpaluwas nin pribadong mga retrato o video bilang pagbalos pwedeng magkapot nin legal na paninimbagan. An konsepto nin rasonableng pag-asa nin privacy importante man, orog na sa mga pribadong lugar kun saen an sarong tawo naglalaom na dai ma-film o ma-record.
Pinatanidan man an publiko sa mga bagong banta na dara kan teknolohiya, kabali na an pag-hack asin paggamit nin artificial intelligence o deepfake. Dawa ngani an nagkapirang deepfake video tibaad dai sakop kan RA 9995, pwede pa man giraray ining magbalga sa ibang mga ley laban sa cybercrime. Sa rason na ini, pig-eenkaminar an publiko na magin maingat sa pagshare nin mga sensitibong litrato asin video tanganing maibitaran an pang-aabuso asin posibleng pang-blackmail.
Sa irarom kan RA 9995, an mga napatunayan na nagbalga pwedeng mapreso nin tolo sagkod pitong taon asin magmulta nin ₱100,000 sagkod ₱500,000, dugang pa sa posibleng dagdag na danyos para sa biktima. Inaabisuhan man an mga biktima na tulos na magreport sa PNP o NBI Cybercrime units, ipreserbar an gabos na ebidensya, asin maghagad nin legal asin emosyonal na suporta tanganing mapanimbag an mga responsable asin maprotehiran an saindang deretso sa privacy.
