Aram baya nindo mga kabombo! nag-anunsyar an City Hall kan Paris nin sarong pambihirang raffle para sa saindang mga residente.
Alagad imbes na kwarta, an premyo sa pagkakataong ini, iyo an makabakal nin lote asin makahimlay sa saro sa mga pinakabistado asin makasaysayang sementeryo sa siyudad.
Kabali sa mga sementeryong ini iyo an Père-Lachaise, kun saen nakalubong an bokalista kan “The Doors” na si Jim Morrison asin an parasurat na si Oscar Wilde.
Sigun sa City Hall, obheto kaining ma-restore o maisaayos an mga lumang puntod na napabayaan na, kasabay kan pagtatao nin pagkakataon sa mga residente na makakua nin puwesto sa mga sementeryong haros sarong siglo nang pano.
An mga sementeryo sa laog kan Paris an haros pano na magpuon pa kan 1900s, asin man nagin kumplikado an paghali kan mga abandonadong puntod huli sa mga local laws.
Kun kaya, ngunyan an mga manggagana sa raffle an tatawan nin karapatang bakalon asin ipaayos an saro sa 30 abandonadong puntod sa tulong sikat na sementeryo. Ini an Père-Lachaise (kun saen nakalubong sinda Jim Morrison, Oscar Wilde, asin Édith Piaf); Montparnasse (dito nakalubong sinda Jean-Paul Sartre asin Simone de Beauvoir); asin Montmartre (nakalubong sinda Edgar Degas asin Émile Zola)
Ang kada puntod an mababakal sa kantidad na 4,000 euros, asin an manggagana man an masagot sa gabos kan gastos sa pagpapakarhay kaini.
Makalihis na ma-restore, kaipuhan pa nindang bakalaon an lease o karapatan sa daga. Nagpupuon ini sa 976 euros para sa 10-year contract, asin man nag aabot sa 17,668 euros para sa perpetuity o habambuhay na karapatan.
An mga mawot na magbali, kaipuhan man na magbayad nin 125 euro na registration fee. An aplikasyon an nagpuon kan November 6 hasta December 31.
