Bantay-sarado ngunyan an mga rally sites sa Metro Manila sa tahaw kan huma kan mahewasang protesta kan mga tagasuporta ni dating Presidente Rodrigo Duterte kasunod kan saiyang pagkakaarestar kan nakalihis na aldaw nin Martes, Marso 11.
Ini an komo kasimbagan sa kasuguan kan Philippine National Police (PNP) sa gabos nin police forces na ibugtak sa heightened alert status.
Sigun ki NCRPO PBrig. Gen. Anthony Aberin, nakapokus sinda sa pagmamantinir nin katrangkiluhan asin kaayusan sa rehiyon partikularmente na an pagsimbag sa gabos nin posibleng epekto kan anuman na mga hiro sa mga motorista asin byahero o pasahero na kadaklan ay mga obrero asin mga estudyante.
Sa presente, pigbabantayan kan mga pigkuriyat na kapulisan an EDSA Shrine kun saen pig inkaminar ni dating presidential spokesperson Atty. Harry Roque an mga pro-Duterte na magtiripun-tipon asin magsagibo nin protesta kontra sa soboot iligal na pag-arestar sa dating Presidente.
Kaiba sa padagos na pig babantayan iyo an mga rally sites sa Mendiola asin Liwasang Bonifacio sa Maynila, Welcome Rotonda sa boundary kan Quezon City asin Manila, asin magin man sa People Power Monument sa Quezon City.
Para an malikyan an mga posibleng kariribokan sa pag ultanan kan mga atoridad asin nagra-rally, pig atasan an mga police commander na makipag-dayalogo sa mga organizer kan rally.
