NAGA CITY – Pormal nang nagpuon kasubagong mag-oomagahon an Ramadan digdi sa Pilipinas.
An Ramadan an ika-9 na bulan sa Islamic Calendar asin pigmamarkahan ini komo panahon kan pagpa-fasting, pag reflect, pagtarabangan asin pagpapangadyi.
Sigun ki Ustadz Zubair Ditucalan sarong Imam, sinaysay kaini na sa panahon kan Ramadan nakakanuod an mga tawo na maglikay sa mga salang gibo.
Nalilikayan kan mga ini an maghambog o magsinungaling, nalilikayan man ninda na mag-isip nin maraot o kalaswaan. Mantang nakakanuod man an mga ini na magpangadyi asin maghagad nin tawad sa gabos kan saindang mga kasalanan ki Allah.
Nagdudurar man nin sarong bulan an nasambitan ng tradisyon kun sain digdi nakakanuod man sinda na magdisiplina sa pagkakan. Ini huli ta dae sinda pigtutugutan na magkakan asin mag-inom nin anuman toyong aldaw, pupwede sana sindang magkakan nin sarong meal o pig-aapod na suhoor o sehri toyong mag-oomagahon asin an sunod na kaini an pig-aapod na iftar o makalihis na maglubog an saldang.
Nalilmitaran man soboot an pakikisalamuha ninda sa saindang mga kapwa toyong panahon kan Ramadan huli ta an pokus kan mga Muslim an magpangadyi. Tinawan duon man ni Ditucalan na igwa man nin pig-eexempt sa nasambitan ng tradisyon, kabali na digdi an mga igwa nin helang, mga aki na mayo pa sa edad asin mga kababaihan na igwa nin sararadit pang omboy na pig bebreast feed.
Alagad, tangani soboot na dae mag-untok an biyaya na pigtatao ni Allah, an sarong indibidwal na dae nakapag partisipar sa Ramadan huli sa manlaen-laen na rason an kaipuhan na magdonar nin katampad kan saiyang ginastos sa laog kan sarong aldaw sa mga nagtitios na namamanwaan.
Makalihis an Ramadan digdi naman sinda nagkakaigwa nin pag-oogma asin pagkatay nin mga hayop komo pagrumdom sa pag-aalay na ginibo ni Abrahan ki Allah.
Sa ngunyan, tinawan duon na sana kan opisyal na an totoong Muslim an nagsusunod sa mga kasuguan ni Allah asin an mga naggigibo nin maraot sa saindang kapwa an dae man maiikonsiderar na parte kan saindang komunidad.
