Pigbubusol ngunyan sa senado sa pangengenot ni Senator Erwin Tulfo an random na pagiinspeksyon sa lugar mismo kan mga proyekto kan gobyerno tangani masiguro na nagagamit nin tama an pondo kan bayan asin dae masayang an kwarta kan mga mamamayan.
Katakod ini kan mga nagluwas na isyu sa paggasta kan 2025 national budget.
Kun saen nabugyagyag an mga soboot anomalya sa paggamit kan pondo, partikular na an napakadakulang flood control project scandal.
Sa ngunyan ibinubusol an pagbilog kan Joint Congressional Oversight Committee tangani na subaybayan an pagpapautob nin mga programa asin proyekto kan gobyerno tangani masiguro na nagigibo an mga ini asin tama an pinaggagamitan kan pondo gikan sa 2026 Genaral Appropriations Act (GAA).
Marurumduman kansuarin sana tinintaan ni Presidente Ferdinand “bongbong” Marcos Jr. an ley sa pambansang budget para sa taong 2026, kun saen nagkapira sa mga unprogrammed appropriations an vineto kan presidente na umabot sa nagkakantidad na P92.5 bilyon.
Kun kaya nilalaoman na an mga magigin parte kan ibinubusol na komite an haralangkaw an kredibilidad tangani masiguro na an mga iluluwas na ulat o impormasyon an iyong katotohanan sana, ngunyan may mga miyembro kan Kongreso na soboot naglaog o nag-endorso kan pirang mga proyektong pabor sa saindang pansadiring interes sa budget kan 2026.
