NAGA CITY-Inirereklamo ngonyan kan nagdalagang SK Chairman sa Barangay Padlos, Libmanan, Camarines Sur an nangyaring recount sa SK Chairman position na suboot biglaan asin dae nag-agi sa tamang proseso.
Sa entrevista kan Bombo Radyo Naga ki Jamael Cariño, nagkandidatong SK Chairman sa nasambitang lugar, sinaysay kaini na nangyari an bilangan kan Mayo 14, nagluluwas na tabla sinda kan kalaban niyang si Ivy Tolledo sa botong 68.
Sigon ki Cariño, kan matapos an bilangan inapod siya kan saiyang poll watcher para sabihon na magto-toss coin sinda kan saiyang kalaban.
Alagad, ikinabigla suboot ni Cariño huli ta kan nag-abot siya sa polling precinct asin patapos na an “recount.”
Napag-araman na igwa nin nag-request suboot sa mga Board of Election Tellers (BET) na magkaigwa nin recount.
Sa nangyari suboot na recount nagluwas na daog si Cariño nin sarong boto kan saiyang nakalaban.
Nanindugan man an nasambitang kandidato na bakong tama an proseso kan nangyaring recount.
Sa ngonyan, tinawan doon ni Cariño na ipagpapadagos niya an pagsasangat nin reklamo manungod sa pangyayari.
