NAGA CITY – Nakua ni Masoud Pezeshkian, sarong reformist, an trayumpo sa pigsagibong presidential elections sa Iran.
Pigdaog ni Pezeshkian an saiyang karibal sa paagi nin dakulang kalamangan.
Nangyari ini sa tahaw kan labing tensyon sa laog asin luwas kan saindang nasyon. Gikan sa 30.5 milyong boto na binilang sa runoff, nakakua si Pezeshkian nin labi sa 16.3 milyon. Digdi dinaog kaini an saiyang ultraconservative na karibal na si Saeed Jalili, na nakakua nin 13.5 milyon nin boto sigun sa Iran media.
Napag-araman na an voter’s turnout may kabilugan na 49.8% sana.
Nahalal si Pezeshkian sa ikaduwang round kan pagboto makalihis kaining makua an pinakahalangkaw na numero kan mga balota.
