NAGA CITY-Pigpaliwang kan Regional Director kan DepEd Bicol an dapit sa bagong kasuguan na nakapalaog sa Deped Order No. 22 series of 2024.
Sa entrevista kan Bombo Radyo Naga ki Dr. Gilbert Sadsad, Regional Director kan DEPED-Bicol, sinaysay kaini na an nasambitan ng kasuguan an nagtatao nin otoridad sa mga Schoold Heads na magdeklarar nin suspension of classess depende sa rainfall warning na pigpaluwas kan Pagasa.
Sigun pa ki Sadsad, enkaso orange warning an nakabandera sa lugar kun saen makukua an eskwelahan, otomatiko na pwedeng ideklarar an suspension kan klase maski dae nagdeklarar an LGU.
Dugang pa kan opisyal, nakapalaog pa sa Deped order an guidelines sa class and work suspensions sa mga eskwelahan tuyong igwang bagyo, tropical cyclones, heavy rainfall, pagbaha, linog, power outages, extreme heat, low air quality, asin iba pang emergencies asin hazards.
Apwera digde, an nasambitan pa man na kasuguan an nagtatao nin otoridad sa mga Schools superintendent na magsuspende nin klase maski yellow warning an pigbandera kan Pagasa.
Sa ngunyan, pigsierto na sana ni Sadsad na padagos an saindang piggigibong mga lakdang tanganing maresolbaran an dapit sa pag-issue kan suspension nin klase tuyong igwang raot kan panahon tanganing magtinir na salbado an mga estudyante.
