NAGA CITY- Nagpapadagos an pag-iikot kan Persons With Disability Affairs Office (PDAO) sa mga barangay sa siyudad nin Naga para sa pagrehistro kan mga igwang kakundian.
Katakod kaini, nasa labing 10 pa soboot na barangay an saindang nakatalaan na bisitahon dapit sa programa.
Pakiulay man kan nasambitan ng opisian na kun igwang namemeke kan ID sa siyudad an tolos na ipaabot sa saindang opisina tanganing matawan nin magkakanigong aksyon.
Sigun ki PDAO Head Atty. PJ Barrosa, kadakol mawot na mapabali digde huli sa mga pribilehiyo siring kan diskuwento, alagad nag-aagi sa magkakanigong screening an mga nag apply.
Dugang pa kan opisyal, an doktor an naghihiling kun laog ba sa guidelines kan Department of Health sa pagtukoy sa kakundian.
Mientrastanto, pig-enkaminar man ni Barrosa an publiko na makipagtabangan an publiko tanganing madakop na an mga tawo na naggagamit nin pekeng PWD ID tanganing malikayan an pag-abuso digde.
Basado kaya sa report kan mga kapulisan bako na sana sa mga tinampo mababakal an mga pekeng ID kundi magin sa online.
Pigtawan duon pa ni Barrosa, ini an maikokonsederar na porma nin pandadaya sa gobierno asin sa iba.
