NAGA CITY- Nagpapadagos an rehabilitasyon kan Forests in Our Midst sites na nadanyaran kan nakalihis na Bagyong Kristine sa siyudad nin Naga.
Sa nagin paghampang sa mga kagawad kan media ni Engr. Alexander Caning Naga, pamayo kan City Engineers Office, sinaysay kaini na padagos an saindang pag-enkaminar sa mga grupo, organisasyon asin iba pang mga indibidwal na mawot magkundisir nin tree planting activities sa FOM sites tanganing makatabang sa nasambitan ng rehabilitasyon.
An nasambitan kaya na aktibidad dakula an katabangan tanganing maprotehiran an kapalibutan siringman kaipuhan na maray sa laog kan FOM sites.
Sigun sa opisyal, obligasyon kan City Enro na magtao nin power support asin seedlings siringman maserbeng guide sa pagsakat sa nasambitan ng lugar para sa mga mawot na magsagibo nin tree planting activity.
Marurumduman, huli sa pagragasa kan makusog na sulog dara kan sunod-sunod na bagyo nadanyaran an nagkapirang areas sa FOM sites na padagos na piglalapigutan na pamakarhay.
Sa ngunyan, kamawotan na sana kan opisyal na magdagos-dagos an pagmarhay kan panahon tanganing magtaralobo nin magayon an mga pigtanom na puon kan kahoy sa nasambitan ng lugar.
