Pigbusol ni Senador Raffy Tulfo an prosopwestong ley na magmamando kan reimbursement sa travel expenses kan mga Pilipinong pasaherong na-off load o dae pinasakay sa eroplano huli sa bakong makatarungan asin haloy na pre-depature procedures kan Bureau of Immigration.
Pigsunad ni Tulfo an Senate Bill No. 1657 o aapudon na “Passenger Protection and Reimbursement for Deferred Departure Act” kasunod kan mga nareresebir na reklamo gikan sa mga pasaherong na-offload huli soboot sa bakong pare-parehong pamantayan kan assessment asin kawaran nin malinaw na paliwanag gikan sa BI.
Obheto kan prosopwesto na protehiran an mga pasaherong gikan sa dugang na gastuson na bako nindang kasalan.
Nakapalaman man sa prosopwesto na isasapinal sa ley an probisyon sa 2024 General Appropriations Act (GAA) na nagsasaysay na an travel expenses kan mga pasaherong na-defer o na-offload nin mayong court order an pwedeng ibawas sa Special Trust Fund Account kan Bureau of Immigration.
Nilinaw man sa prosopwesto na dae sakop kan reimbursement an mga pasaherong kulang o mayong tamang travel documents, igwang nag-iiral na court order, naggagamit nin peke o pinekeng dokumento, asin mga nahiling na posibleng biktima kan human trafficking o imbwelyo sa illegal recruitment.
Mientrastanto, itatalaan man sa prosopwesto na an Bureau of Immigration, sa paagi kan International Port of Entry and Exit Management Office (IPEE-MO) an maresebir asin masuri kan mga claim para sa reimbursement antes isumiter sa Department of Justice-Inter-Agency Council Against Trafficking (IACAT) para sa pinal na pagdedesisyon
