Nagpromisa nin transparency asin accountability si dating Justice secretary Boying Remulla na ngunyan itinalaga ni Presidente Bongbong Marcos komo bagong Ombudsman.
Sinaysay ni Remulla na magkakaigwa nin mas bukas asin transparent na Tanodbayan sa irarom kan saiyang pamamayo. Sigun ki Remulla, an trabaho kan Ombudsman an para sa bilog na Pilipinas asin bako para sa sarong kampo kan pulitiko.
Simbag ini kan bagong Ombudsman sa pahayag ni Senator Imee Marcos na itinalaga ini sa posisyon tangani itulak soboot an pagpapakulong ki VP Sara Duterte.
Kun an pag-uulayan man an mga kaso na iniimbestigaran kan gobyerno, sinaysay ni Remulla na iinuton kaini an isyu sa flood control anomaly.
Sa kaso man ni VP Sara, sinaysay ni Remulla na pag-aadalan man ninda an committee report na pigsunad kan Kamara sa Office of the Ombudsman katakod sa isyu kan confidential funds kaini.
Nakatalaang manumpa si Remulla sa Huwebes mantang piglalaomang mapuon na sa bagong tungkulin pag-abot sa aldaw nin Biyernes.
