Maduong pinahimutikan ni Batangas 1st Representative Leandro Legarda-Leviste an nakabugtak sa affidavit ni Department of Public Works and Highways (DPWH) Batangas District Engineer Abelardo Calalo na donasyon asin bakong suhol an milyones na kwarta na pigporbar kaining itao sa saiya.
Binanggit ni Leviste na an kwarta an igwang resibo nin tulong kontrata na mapakol sa ₱104 million, asin may “note” na 3% kan labi sa ₱3 million.
Huli kaini, pighahamon man ni Leviste ki Calalo na isapubliko an pangaran kan mga contractors na sinasabi kaining preparadong magtao nin donasyon na posibleng magpakol nin hasta sa ₱360 million.
Sigun ki Leviste, bako man totoo an sinabi ni Calalo na sinabihan ini ni Uswag Ilonggo Party-list Representative James “Jojo” Ang na mangolektar nin mga donasyon gikan sa mga contractor komo suporta sa saiyang mga proyekto.
