Nagbutas na sa saiyang posisyon si Ako Bicol Partylist Rep. Elizaldy “Zaldy” Co komo miyembro kan mababang kapulungan kan Kongreso kasuodma, Setyembre 29, 2025.
Sa saiyang surat ki House Speaker Faustino “Bojie” Dy, pighurot ni Co na an saiyang desisyon an dara kan matinding hima sa buhay kan saiyang pamilya asin kan sadiri, kasabay kan soboot pagbalgar sa saiyang karapatang pantao asin due process.
An pagbubutas an kasabay kan deadline na pigtalaan ni Speaker Dy para sa pagbebweltada ni Co sa nasyon makalihis bawion an saiyang travel clearance.
Nagin sentro si Co kan kontrobersiya katakod kan soboot anomalya sa flood control projects sa Mindoro, kun saen ini an inirekomendang sunadan nin kaso kan Independent Commission for Infrastructure (ICI) huli sa posibleng pagbalgar sa Anti-Graft and Corrupt Practices Act asin iba pang ley.
Apwera sa ethics complaint na pigsunad ni Rep. Toby Tiangco kan Navotas, si Co an pigkokonektar sa mga soboot kickback gikan sa mga proyekto kan Department of Public Works and Highways (DPWH), bagay na maduon man kaining pinahimutikan.
Mientrastanto, pigkumpirmar kan Philippine National Police (PNP) an pag-recall sa limang police escorts ni Co makalihis ining maghali nin masyon, komo parte kan standard operating procedure kun mayo na sa nasyon an sarong opisyal.
An pagbubutas ni Co an nagdadara nin bakante sa pwesto kan Ako Bicol Partylist sa Kongreso mantang padagos an imbestigasyon sa mga alegasyon kan katiwalian.
