Pinahimutikan ni Ako Bicol party-list Rep. Zaldy Co an mga alegasyon kontra saiya katakod kan 2025 budget sa isinagibong hearing kan Senado kasuodma, Lunes, Setyembre 8.
Sa sarong pahayag, sinabi ni Co na an mga alegasyon an warang basehan, iresponsable asin parte sana kan politikal na lakdang tanganing lihisan an isyu asin ribongon an publikoIpinagiromdom man kan lehislador na an 2025 national budget an naaprubaran kan parehong kapulungan kan Kongreso asin pinirmahan mismo ni Presidente Ferdinand Marcos Jr.
Binanggit man kaini na may pirang probisyon sa budget na na-veto kan Presidente asin dae tinugutang mailuwas an pondo para sa nagkapirang proyekto.
Siring man, huli an 2025 General Appropriations Act an presenteng nakabinbin sa Korte Suprema asin sa Ombudsman, nagsayuma si Co na magtao pa nin dugang na pahayag katakod kan isyu.
Sa ikatulong hearing kan Senado, katakod sa mga maanomalyang flood mitigation program, inakusaran ni Navotas City Rep. Toby Tiangco si Co nin pag-insert nin P13.8 bilyon sa bersiyon kan 2025 national budget kan bicameral conference committee, na kompwesto kan pondo para sa flood control asin iba pang proyektong pang-imprastraktura.
