NAGA CITY- On-going an restoration effort kan mga personahe kan Bicol Central Station tanganing liwat na makabwelta sa dati an operasyon kaini.
Sa entrevista kan Bombo Radyo Naga ki Nonoy Reforsado, Bicol Central Station Operation Manager, sinaysay kaini na an saindang mga maintenance personnel padagos an paglilinig sa laog kan terminal tanganing ma-clear na an mga basura na nakatambak sa lugar.
Sigun pa ki Reforsado, pigbukasan an terminal kan nakalihis na Domingo tanganing makabiyahe na an mga stranded na pasahero na papuli pa sa pagtaraid na munisipalidad asin an mga pasiring sa Metro Manila.
Katakod digde, balik operasyon na an rutang Naga-NCR siringman igwa naman biyahe an mga minasunod na ruta sa laog kan rehiyon nin Bikol: Naga-Caramoan, Naga-Rinconada, Naga-Partido, and Naga-Legazpi.
Mantang an biyaheng Naga-Daet asin Naga-Bulan, Sorsogon, pighahalat pa an kunfirmasyon kan mga kompanya enkaso igwang biyahe sa mga nasambitan ng ruta. Marurumduman, kasuudma man pig-hold an mga lunadan na palaog sa siyudad nin Naga tanganing ma-decongest an traffic na yaon sa Maharlika Highway.
Dugang pa kan opisyal, igwang mga available na bus na dae na kaipuhan pa an reservation alagad an mga mapa-book, kaipuhan na magdulok sa booking offices. Para man sa mga inabot kan baha na mga buses, luway-luway na pig pick-up an mga ini tanganing pakarhayon.
Mantang para man sa pamasahe, piglinaw kan opisyal na igwang fare matrix na pigsusunod kun kaya an siisay man na igwang reklamo kaipuhan sana na ipaabot soboot ini sa LTFRB o kaya sa saindang opisina. Pigsierto man ni Reforsado na enkaso dagusan ng mapakarhay an bilog na terminal balik na sa 24/7 an saindang operasyon.
Sa ngunyan, mayo pang eksaktong danyos sa lado kan Bicol Central Station makalihis an panlalamasa kan Bagyong Kristine alagad igwa soboot totally and partially damage na area siring kan receipt duplicate puon 2013 hasta October 20, 2024.
