NAGA CITY- Kumpiyansa si dating Philippine National Police (PNP) Chief asin ngonyan Bureau of Corrections (BuCor) Dir. Gen Ronald ‘Bato’ Dela Rosa na magpapaluwas nin kompleto asin komprehensibong resulta kan imbestigasyon an Police Regional Office (PRO) 4A katakod kan magkakasuway na insidente nin pambabaril sa mga opisyal kan lokal na gobyerno sa saindang nasasakupan.
Sigon sa dating PNP Chief, ginigibo kan mga kabuhan kan PNP Calabarzon an gabos para mas magin ‘credible’ asin kompleto an isasapublikong resulta kan saindang imbestigasyon sa paggadan kina Tanauan City Mayor Antonio Halili asin an pananambang ki Trece Martires City Vice Mayor Alex Lubigan na parehong nangyari kan nakaaging semana.
Likay man si Dela Rosa na magtao nin komento manungod sa insidente huli ta posibleng makaapektar suboot ini sa dalagan kan imbestigasyon.
Tinawan doon kan dating PNP Chief na dapat na halaton na sana kan publiko an ipapaluwas na resulta kan imbestigasyon kan pulisya sa pangyayari.
Mientrastanto, sa mensaheng ipinaabot sa Bombo Radyo Naga ni P/Supt. Chitadel Gaoiran, tagapagtaram kan PNP Calabarzon, nakatalaan suboot sindang magkondusir nin press conference ngonyan na aga katakod kan saindang update sa paggadan kina Mayor Halili asin Vice Mayor Lubigan.
