NAGA CITY- Padagos pang pighahanap kan mga otoridad an sarong retiradong miyembro kan Armed Forces of the Philippines (AFP) makalihis na maimbwelto sa insidente kan pambabadil sa sarong bilar sa Lopez, Quezon.
Basado sa inisyal na imbestigasyon kan PNP Lopez, burat asin nagkakawat nin baraha an suspek na si Romeo Molina, 53-anyos kaibanan an mga biktimang sinda Edwin Tañedo, 48-anyos asin Ben Boleyley, 38-anyos kan biglang magkainitan sinda Molina asin Tañedo.
Binunot suboot kan suspek an dara kaining badil asin pinagbabadil si Boleyley na tinamaan sa saiyang duwang tabay mantang nagsapo man nin lugad sa saiyang daghan asin tabay si Tañedo.
Tulos man na pigdalagan sa ospital an duwang biktima para maipabulong.
Marikas man na nagdulag an suspetsado lunad kan saiyang motorsiklo pasiring sa dae pa maaraman na direksyon.
Padagos pa nanggad an pigkokondusir na operasyon kan PNP Lopez para madakop tulos an nagdulag na suspetsado.
